15 чэрвеня, у нядзелю, Згуртаваньне Беларускай Моладзі ў Амэрыцы і Беларуска-Амэрыканскае Задзіночаньне ладзяць мітынг у падтрымку свабоды веравызнаньня, правоў і свабодаў беларускай моладзі.

Апошнім часам актывісты хрысьціянскіх і моладзевых арганізацыяў адчуваюць небачны раней ціск з боку дыктатарскага рэжыму Лукашэнкі.

Адчуваючы, што падрастае новае пакаленьне змагароў за дэмакратычную будучыню Беларусі, рэжым бачыць у гэтым галоўную небясьпеку для свайго існаваньня. Жорсткімі і амаральнымі захадамі змагарная моладзь кідаецца ў турмы, выганяецца са школаў.

Беларусы ЗША робяць усё магчымае, каб прыцягннуць увагу сусьветнай супольнасьці і амэрыканскіх уладаў да парушэньня правоў чалавека на Беларусі! Будзе праведзены збор подпісаў пад зваротам да амэрыканскага кангрэсу для разгляду сітуацыі са свабодай рэлігіі ў Кангрэсе ЗША.

Іван Шыла трымайся! Беларусы Амэрыкі не дапусьцыць таго, каб рэжым Лукашэнкі парушаў твае правы і пазбаўляў мажлівасьці навучацца!

Мітынг адбудзецца ў 12 гадзін каля будынку Арганізацыі Аб’яднаных Нацый!

Заклікаем да ўдзелу ўсіх неабыякавых людзей!

Дапамагай нам Бог! Жыве Беларусь!